В Атырау +35.6 
Бақылау шараларының нәтижесінде 98 заңсыз қоқыс алаңы жойылып, міндетін салғырт атқарған 41 шенеунік пен 480-нен астам азаматқа әкімшілік жаза қолданылды.
Атырау облысының прокуратурасы «Таза Қазақстан» экологиялық акциясы аясында елді мекендердегі тазалық пен абаттандыру қағидаларының сақталуын қамтамасыз ету мақсатында құқық қорғау және жергілікті атқарушы органдардың жұмысын үйлестірді. Бұл бағытта полициямен және әкімдіктермен бірлескен ауқымды рейдтік шаралар жүргізілуде.
Атқарылған жұмыстардың негізгі нәтижелері:
Заңсыз қоқыс алаңдарын тазалау: Өңірде 48 бірлескен рейд өткізіліп, 98 заңсыз қоқыс орны анықталды. Прокурорлық қадағалау актілерінің нәтижесінде 84 аумақ толық тазартылып, 1000 тоннаға жуық қалдық шығарылды.
Тәртіп бұзушыларды жауапқа тарту: Экологиялық заңнаманы сақтамаған 483 жеке және заңды тұлға әкімшілік жауаптылыққа тартылды.
Шенеуніктердің жауапкершілігі: Санитарлық тазалықты тиісінше қадағаламаған және қызметтік міндеттерін салғырт атқарған 41 лауазымды тұлға жазаланды.
«Белгіленбеген орындарға қоқыс төгу мен қоғамдық аумақтарды ластау — заң алдындағы жауапкершілікке әкеп соқтырады. Қоршаған ортаға ұқыпты қарау — әрбір тұрғынның тазалықты сақтауға, экологиялық қауіпсіздікті қамтамасыз етуге қосатын азаматтық үлесі», — деп ескертеді Атырау облысының прокуратурасы.
Өңірде заңсыз қоқыс үйінділерін жою және бақылау жұмыстары жалғасып жатыр және қадағалау органының назарында болады.