В Атырау +35.6 
Қаланың спорттық беделін арттыратын ең ірі арена құрылысы 2028 жылдың наурыз айында толық аяқталады, деп хабарлады Алматы облысы әкімдігі.
Алматыда халықаралық деңгейдегі футбол матчтарын өткізуге мүмкіндік беретін заманауи жаңа стадионның құрылысы қарқынды жүріп жатыр. Аумағы 32 гектарды құрайтын ауқымды нысан Құлжа және Талғар тасжолдарының қиылысында орналасқан. 45 мың көрерменге шақталған спорт аренасы УЕФА-ның ең жоғары IV санаты талаптарына толық сай келеді. Жобаның барысы туралы Өңірлік коммуникациялар қызметінде өткен баспасөз мәслихатында Алматы қаласы Құрылыс басқармасының басшысы Нұрбол Нұрсағатов хабарлады.
«Жаңа стадионның құрылысы — Алматының спорт инфрақұрылымын сапалы жаңа деңгейге көтеретін маңызды жоба. Арена ірі халықаралық жарыстарды қабылдауға мүмкіндік беріп қана қоймай, отандық футболдың дамуына соны серпін береді әрі шаһардың аймақтағы басты спорт орталығы ретіндегі мәртебесін бекемдей түседі», — деп атап өтті Нұрбол Нұрсағатов.
Жобаның негізгі артықшылықтары мен инфрақұрылымдық мүмкіндіктері:
Кешенді инфрақұрылым: Басты аренадан бөлек, аумақта жаттығу алаңдары, спортшылар мен командаларға арналған заманауи киім ауыстыру орындары, жанкүйерлер аймағы және қауіпсіздік жүйелері қарастырылған.
Көлік логистикасы: Нысанның магистральды жолдар бойында орналасуы қалалық көлік торына оңай кірігуге мүмкіндік береді. Іргелес жолдарды кеңейту арқылы бұқаралық шаралар кезінде кептелістің алдын алу және жанкүйерлердің толық қауіпсіз әрі қолайлы қатынауын қамтамасыз ету жоспарланған.
Аумақты абаттандыру: Стадион айналасы көгалдандырылып, қала тұрғындары мен қонақтарына арналған заманауи демалыс аймағы құрылады.