В Атырау +22.1 
Қазақстан инвестициялық тәуекелдер мен тұрақтылықтың халықаралық рейтингінде 150 елдің арасында 70-орыннан 53-орынға көтеріліп, Орталық Азияда көш бастады.
Ел позициясының нығаю себептері Investing.com аналитикалық платформасындағы материалда сараланды.
Мақала авторларының айтуынша, инвесторлардың ел таңдау тәсілі өзгерген. Енді табыстылық, салықтық жеңілдіктер мен ресурстарға қолжетімділікпен қатар, мемлекеттік институттардың сапасы, экономикалық саясаттың тұрақтылығы және елдің сыртқы дағдарыстарға төтеп беру қабілеті де маңызды рөл атқарады.
Осыған байланысты сенім дербес экономикалық капиталға айналып келеді. Қаржыландыру құны, жобаларды іске қосу мерзімі және халықаралық компаниялардың жаңа өндіріс орындарын ашуға дайындығы осы факторға тәуелді.
Инвестициялық белсенділіктің өсуін көрсететін көрсеткіштердің бірі — негізгі капиталға салынған инвестиция көлемі. 2026 жылдың бірінші жартыжылдығында ол 9,5 трлн теңгеге жетіп, 9,6%-ға артты. Жеке инвестициялар 21,4%-ға өсіп, олардың үлесі 87%-ды құрады.
Инвестициялардың ең жоғары өсімі ақпарат және байланыс, құрылыс, өңдеу өнеркәсібі, ауыл шаруашылығы мен көлік салаларында тіркелді. Investing.com сарапшыларының пікірінше, экономикалық өсім көздерінің көбеюі Қазақстанның шикізат нарығына тәуелділігін төмендетіп, сыртқы күйзелістерге төзімділігін арттырады.
Халықаралық қаржы институттары да Қазақстанның экономикалық келешегін оң бағалап отыр. Халықаралық валюта қоры мен Дүниежүзілік банк 2026 жылы ел экономикасы 4,6%-ға өседі деп болжайды. ХВҚ бұл қарқынды мұнай бағасының жоғары болуымен де байланыстырады. Ал Дүниежүзілік банк 2028 жылға қарай экономикалық өсім біртіндеп 3,5%-ға дейін баяулайды деп күтеді.
Қазақстан инвестициялық деңгейдегі кредиттік рейтингтерін де сақтап отыр. Fitch ел рейтингін тұрақты болжаммен BBB, S&P оң болжаммен BBB−, ал Moody’s тұрақты болжаммен Baa1 деңгейінде растады.
Мақала авторлары халықаралық рейтингтер өзіндік мақсатқа айналмауы тиіс екенін атап өтті. Дегенмен рейтингтердегі көрсеткіштердің жақсаруы тәуекел деңгейін төмендетіп, капитал тартуды жеңілдетеді және шетелдік компаниялардың Қазақстандағы ұзақмерзімді жобаларға қызығушылығын арттырады.