В Атырау +31.1 
Қазақстандағы несиелердің орташа мөлшерлемесі маусым айында айтарлықтай төмендеді. Ұлттық банктің дерегіне сәйкес, халыққа теңгеде берілген қарыздардың орташа ставкасы мамырдағы 22,7%-дан 20,9%-ға түсті.
Ең көп арзандағаны — 1 жылдан 5 жылға дейінгі мерзімге берілетін несиелер, олардың мөлшерлемесі бірден 2,8 пайыздық тармаққа төмендеп, 23%-ды құрады. Қысқа мерзімді қарыздар да арзандады: бір айға дейінгі несиелер 26,5%-дан 24,9%-ға, үш айдан бір жылға дейінгі қарыздар 22,7%-дан 21,1%-ға түсті.
Алайда ұзақ мерзімді, бес жылдан асатын несиелер бойынша жағдай керісінше: орташа ставка 15,2%-дан 15,7%-ға көтерілді. Бизнеске берілетін қарыздарда өзгеріс аса үлкен емес — заңды тұлғаларға теңгедегі несиелердің орташа мөлшерлемесі 20,3%-дан 19,8%-ға түсті.
Бұл өзгерістер Ұлттық банктің базалық мөлшерлемені екі рет төмендетуімен байланысты. 5 маусымда ол 18%-дан 17%-ға, ал 24 шілдеде қатарынан екінші рет 16,75%-ға түсірілді. Қаржыгер Арсен Темірбаевтың айтуынша, шілде қорытындысы бойынша халыққа берілетін несиелердің орташа ставкасы 20,6–20,8% деңгейіне дейін түсуі мүмкін, ал негізгі әсер тамыздағы статистикада байқалады.
Айта кету керек, бұл тек ай ішінде берілген жаңа несиелердің орташа көрсеткіші. Бұрын рәсімделген қарыздардың шарттары өзгермейді, ал нақты клиентке ұсынылатын мөлшерлеме банкке, несие түріне, мерзіміне және төлем қабілеттілігіне байланысты.