​Халық саны өскенімен, тұрғындар көшіп жатыр: Атырау облысындағы демографиялық жағдай

Атырау облысы халқының саны 718 250 адамға жетті.

Соңғы бес жылда өңір тұрғындарының саны 34 мыңнан астам адамға немесе 5,1%-ға өсті.

Бұл туралы брифингте Ұлттық статистика бюросы өңірлік департаментінің басшысы Нұржан Құмарғалиев мәлім етті.

Облыс халқының басым бөлігі қалада тұрады — 393 727 адам (54,8%). Ауылдық жерлерде 324 523 тұрғын бар, бұл — 45,2%.

2026 жылдың бірінші тоқсанында өңірде 3 153 сәби дүниеге келді. Халықтың табиғи өсімі 2 332 адамды құрады. Облыстағы өмір сүру ұзақтығы 75,8 жасқа жетті.

Алғашқы үш айда Атырау облысына 10 мыңға жуық адам келсе, 10 943 тұрғын өңірден көшіп кеткен.

Шетелден өңірге 72 адам қоныс аударды. Халықаралық мигранттардың көбі ТМД елдерінен келген, оның ішінде 50 адам — Өзбекстаннан, 15 адам — Ресейден.

Қазақстанның басқа өңірлерінен Атырау облысына 3 309 адам көшіп келді. Жаңа тұрғындардың көбі Астанадан, Батыс Қазақстан және Ақтөбе облыстарынан келген.

Осы кезеңде облыстың 4 431 тұрғыны елдің басқа өңірлеріне қоныс аударса, тағы алты адам шетелге кеткен.