В Атырау +25.6 
Оралда ишемиялық инсульт диагнозы қойылғаннан кейін қайтыс болған 58 жастағы пациенттің ұлына аурухана 4 млн теңге төлеуге міндеттелді.
Сот уақытылы көрсетілмеген медициналық көмектің салдарынан ер адамның аман қалу мүмкіндігінен айырылғанын анықтады.
Қазақстан Жоғарғы сотының хабарлауынша, пациент бірнеше рет көмекке жүгінген, бірақ медицина қызметкерлері мас күйде болды деген сылтаумен оны қажетті тексеруден бас тартқан. Бұл ретте ағзадағы алкоголь мөлшерін анықтайтын зерттеу жүргізілмеген.
Ер адам Денсаулық сақтау басқармасының байланыс орталығына (call-центр) шағымданғаннан кейін ғана терапия бөліміне жатқызылды. Ауруханада оған ишемиялық инсульт диагнозы қойылды. Емдеу басталғанына қарамастан, келесі күні пациент реанимацияда көз жұмды.
Марқұмның ұлы полицияға арызданған, бірақ қылмыстық құқық бұзушылық құрамының болмауына байланысты сотқа дейінгі тергеп-тексеру тоқтатылды. Сонымен бірге Денсаулық сақтау министрлігі Медициналық және фармацевтикалық бақылау комитеті департаментінің тексеруі медициналық көмек көрсету кезінде заңбұзушылықтарды анықтады.
Ер адам аурухана мен емдеуші дәрігерге қарсы арыз беріп, моральдық зиянды өндіруді талап етті. Медициналық мекеме өкілі талапты мойындамады, ал прокурор оны жартылай қанағаттандыруды ұсынды.
Орал қалалық №2 соты уақытылы көрсетілмеген көмек пациентті өлімнен аман қалудың мүмкіндігінен айырды деген қорытындыға келді. Талап қоюшының талаптары жартылай қанағаттандырылып, ауруханадан 4 млн теңге өндірілді.