В Атырау +31.2 
Ақтөбеде 15 жастағы жасөспірімді мешітте соққыға жыққан ер адамға қатысты сот процесі басталды.
Оқиға 2026 жылдың ақпанында тарауих намазы кезінде «Нұр Ғасыр» орталық мешітінде болған. Жасөспірім достарымен бірге мешітке келгенде олардың бірі аяқ киім арасынан тұрған кроссовканы алып, қайта орнына қойған, - деп хабарлайды Hronika.kz.
Мұны көрген 38 жастағы ер адам балалар аяқ киімді ұрламақ болды деп ойлап, біреуін ұрған. Досын қорғауға шыққан 15 жастағы балаға ер адам бірнеше рет қол‑аяғымен соққы жасаған.
Бейнебақылау камерасына түсіп қалған оқиға барысында жасөспірім есінен танып қалған, оны мешіттегі әйелдер тоқтатқан. Баланың миы шайқалып, бас сүйегі жарақаттанғаны анықталып, ол ауруханада 20 күннен астам емделіп, кейін бірнеше ай үйінде қалпына келген.
Ер адамға Қазақстан Қылмыстық кодексінің 107‑бабының 2‑бөлігі және 293‑бабының 2‑бөлігі бойынша айып тағылды.
Жәбірленушінің анасы ұлының денсаулығы нашарлап, үлгерімі төмендегенін айтып, айыпталушыдан кешірім болмағанын жеткізді. Отбасы моральдық шығын ретінде 10 млн теңге талап етуде. Сот процесі жалғасуда, айыпталушының кінәсін сот анықтайды.