В Атырау +39 
Жамбыл аудандық соты бұзақылық ниетпен дене жарақатын келтірген әйелге қатысты қылмыстық істі қарады.
Оқиға 2026 жылдың мамыр айында «Айша бибі» өткізу бекетінде болған. Айыпталушы отбасы мүшелерімен бірге Қырғызстаннан қайтып келе жатып, мемлекеттік шекараны кезексіз кесіп өтпек болған. Кезекте тұрған әйел ескерту жасағаннан кейін олардың арасында сөз таласы шықты.
Шекарадан өткен соң жәбірленуші жағдайды телефонына түсіре бастаған. Ол айыпталушының ұлының телефонын итеріп жіберген кезде, әйел жәбірленушіге жақындап барып, оның бетіне алақанымен соққы жасаған. Қақтығысты куәгерлер тоқтатқан.
Сотта айыпталушының кінәсін тараптардың түсініктемелері, сараптама қорытындысы және бейнежазба дәлелдеді. Мемлекеттік айыптаушы оған 100 сағат қоғамдық жұмыс тағайындауды сұрады. Айыпталушы кінәсін мойындап, өкінетінін айтып, жәбірленушіден кешірім сұрады.
Жәбірленуші бірнеше рет соққы алғанын және ауыр жарақат алғанын мәлімдеді. Алайда сараптама қорытындысы бұл деректерді растамады: жарақаттар денсаулыққа зиян келтірмеген.
Жаза тағайындау кезінде сот әйелдің кінәсін мойындағанын, өкінгенін, бес кәмелетке толмаған баласы бар екенін, бұрын сотталмағанын және ауырлататын мән-жайлардың жоқтығын ескерді.
Нәтижесінде әйел кінәлі деп танылып, оған 100 сағат қоғамдық жұмыс жазасы тағайындалды. Сонымен қатар жәбірленушінің пайдасына 300 мың теңге көлемінде моральдық өтемақы өндірілді.
Үкім заңды күшіне енді.