​Қазақстанда жұмыс істейтін әйелдер саны артты

Қазақстанда экономиканың әртүрлі саласында 4,5 миллионнан астам әйел қызмет етіп жүр. 

Бұл туралы ҚР Ұлттық статистика бюросы 2026 жылдың І тоқсанындағы халықты жұмыспен қамтуды таңдамалы зерттеу қорытындысы бойынша хабарлады.

Бюро мәліметінше, жұмыспен қамтылған әйелдер саны 4 527,1 мың адамды құрады. Бұл өткен жылдың сәйкес кезеңімен салыстырғанда 42,6 мың адамға немесе 0,9%-ға артық.

Жұмыспен қамтылған әйелдердің жалпы санының 3 602,0 мың адамы жалдамалы болып жұмыс істейді. Бұл экономикадағы барлық жұмыспен қамтылған әйелдердің 79,6%-ын құрайды. Тағы 925,1 мың әйел өзін-өзі жұмыспен қамтығандар, олардың үлесі — 20,4%.

Әйелдердің ең көбі білім беру саласында еңбек етеді — 902,2 мың адам, немесе жұмыс істейтін әйелдердің жалпы санының 19,9%-ы.

Екінші орында — көтерме және бөлшек сауда, мұнда 877,6 мың әйел (19,4%) қамтылған. Үшінші орында денсаулық сақтау және халыққа әлеуметтік қызмет көрсету саласы тұр — 426,3 мың адам, немесе 9,4%.

Сондай-ақ жұмыспен қамтылған әйелдердің едәуір бөлігі өнеркәсіпте — 388,1 мың адам және ауыл, орман әрі балық шаруашылығында — 351,2 мың адам тіркелген.

Бір жыл ішінде әйелдерді жұмыспен қамтудың ең елеулі өсуі жылжымайтын мүлікпен жасалатын операциялар саласында — 25,7%-ға, әкімшілік және қосалқы қызмет көрсетуде — 21,9%-ға, көлік және қоймалауда — 16,2%-ға, сондай-ақ өнеркәсіпте — 7,6%-ға тіркелді.

Өңірлік тұрғыда жұмыспен қамтылған әйелдер саны Қарағанды облысында — 7,8%-ға, Ақтөбе облысында — 6,5%-ға, Алматыда — 6,3%-ға, сондай-ақ Түркістан облысында — 6,1%-ға өсті.

Ауылдық жерлермен салыстырғанда, қалаларда жұмыспен қамтылған әйелдер саны артық. Қалалық жерлерде олардың саны 3 008,5 мың адамды құрады.