В Атырау +39 
Қазақстан Денсаулық сақтау министрлігі 15 тамызға дейін елдегі барлық 69 перинаталдық орталықта кешенді тексеру жүргізуді тапсырды.
Санитариялық-эпидемиологиялық бақылау комитеті инфекциялық қауіпсіздік талаптарының орындалуын бағалап, аналар мен жаңа туған нәрестелерді ауруханаішілік инфекциялардан қорғау шараларын күшейтеді.
Министр Ақмарал Әлназарова аппараттық кеңесте инфекциялық бақылаудың басты мақсаты – салдармен күресу емес, тәуекелдердің алдын алу екенін атап өтті. Әрбір жағдай кәсіби тұрғыдан талданып, пациенттердің қауіпсіздігін арттыруға бағытталған нақты шешімдер қабылдануы тиіс.
Тексеру барысында профилактикаға басымдық беріліп, санитариялық қағидалар мен бақылау парақтары жаңартылатын болады. Сонымен қатар өңірлік басқармаларға медициналық ұйымдарды дезинфекция құралдарымен, жеке қорғаныш жабдықтарымен және бір реттік материалдармен қамтамасыз ету тапсырылды.
Антибиотиктерге төзімділік мәселесіне де ерекше назар аударылып, бактерияға қарсы препараттарды тек рецептпен босату талаптарының сақталуына бақылау күшейтіледі.
Тексеру қорытындысы бойынша әр өңірде инфекциялық бақылау жүйесін жетілдіруге арналған жол картасы қабылданады. Бұл шаралар аналар мен нәрестелердің қауіпсіздігін арттыруға, медициналық көмектің сапасын жақсартуға және денсаулық сақтау жүйесіне деген сенімді нығайтуға бағытталған.