В Атырау +36.2 
Бұл галереяға кіру үшін билет те, кезек те қажет емес. Теректі ауданының Сары Өмір ауылына барып, қарапайым үйдің екінші қабатына көтерілсеңіз – алдыңыздан суретшінің әлемі ашылады.
«Ақ Жайық» тілшісі оның үй галереясында болды. Үйдің екінші қабатында бірнеше онжылдықта жазылған ондаған картиналар жинақталған. Мұнда меймандарды музей қызметкері емес, автордың өзі қарсы алады.
Ғиният Дауылбаев 1956 жылы Батыс Қазақстан облысында дүниеге келген. Ол Абай атындағы Қазақ педагогикалық институтын тәмамдап, ұзақ жылдар бойы бейнелеу өнері мен сызудан сабақ берген. Бүгінде суретші Сары Өмір ауылында тұрады және уақытын түгелдей дерлік сурет салуға арнайды.
Біздің сапарымыз кезінде Ғиният аға экскурсияны өзі жүргізді. Ол әрбір картинаның жанында тоқтап, шығармаларына арқау болған адамдар мен оқиғаларды еске алып, белгілі бір сюжеттердің қалай туғанын әңгімеледі.
Әдетте мұндай көрмелерде қонақтар қолдарына шампан шарабы құйылған бокал ұстап жүрсе, мұнда бәрі басқаша болды. Менің қолымда қымыз құйылған кесе болды, ал үй иесі асықпай суреттерін таныстырып, сұрақтарға жауап беріп, естеліктерімен бөлісті.
Виртуалды болса да, сізді осы дала Луврына көз жүгіртуге шақырамыз.
Сұлтан АХМЕТ
Суреттерді түсірген автор