В Атырау +37.1 
Ақтауда Қазақстан Премьер-министрі Олжас Бектенов пен Өзбекстан Премьер-министрі Абдулла Ариповтың төрағалығымен екі ел өңірлері басшылары кеңесінің алғашқы жиыны өтті. Мемлекет басшылары Қасым-Жомарт Тоқаев пен Шавкат Мирзиёевтің шешімімен құрылған бұл тетік өңіраралық ынтымақтастықты дамытуға бағытталған.
Үкімет басшылары бұл диалогтың екі ел арасындағы сауда айналымын $10 млрд-қа дейін жеткізу межесіне қол жеткізуде маңызды рөл атқаратынын атап өтті.
Негізгі талқыланған мәселелер мен келісімдер:
Өнеркәсіп және сауда: «Орталық Азия» халықаралық өнеркәсіптік кооперация орталығын толыққанды іске қосу мен сауда-инвестициялық байланыстарды жандандыру жүктелді;
Көлік және логистика: Транскаспий халықаралық көлік бағыты, Солтүстік–Оңтүстік және Трансауған дәліздерін дамыту әлеуеті сөз болды. Биылғы бірінші жартыжылдықта еліміздің порттары арқылы контейнерлік тасымалдау көлемі 5%-ға артып, 50 мың ЖФЭ-ден асқан;
Туризм мен өңірлік байланыс: Екі ел азаматтарының тарихи-мәдени орталықтарға саяхаттауын арттыру және шекаралас облыстар арасындағы ынтымақтастықты нығайту мәселелері қозғалды.
Жиынға екі елдің өңір басшылары мен 300-ден астам кәсіпкер қатысып, қорытындысы бойынша жалпы сомасы 80 млрд теңгеден астам коммерциялық құжаттар мен меморандумдарға қол қойылды.