АМӨЗ жөндеу жұмыстарынан кейін мұнай өңдеуді қайта бастады

Атырау мұнай өңдеу зауытындағы жоспарлы алдын алу жұмыстары толық аяқталды. 

Кәсіпорын технологиялық режимге шығып, қондырғыларды кезең-кезеңімен іске қосу Энергетика министрлігі бекіткен кестеден 1,5 күн бұрын басталды.

Қазіргі уақытта зауыт тәулігіне 16,2 мың тонна мұнай өңдеуде. Қайта іске қосылғаннан бері 157 мың тонна шикізат өңделіп, тұтынушыларға:

• 35,3 мың тонна автобензин,

• 48,7 мың тонна дизель отыны,

• 5,7 мың тонна сұйытылған газ жөнелтілді.

Жоспарлы жөндеу барысында:

• 20 реактор, 213 сыйымдылық, 32 колонна және 231 жылу алмастырғыш жабдық техникалық куәландырудан өтті;

• 335 тоннадан астам катализатор ауыстырылды;

• құбыр желілерінің кейбір учаскелері жаңартылды;

• ЭЛТҚ АВТ-3 қондырғысы жаңғыртылды.

Ауқымды жұмыстарға шамамен 1 700 маман мен 50-ден астам арнайы техника жұмылдырылды.