В Атырау +34.5 
2026 жылғы 22 шілдеде Маңғыстау облысының әкімі Нұрдәулет Қилыбай Маңғыстау ауданындағы жаңа «Шетпе» теміржол вокзалы ғимаратының ашылу салтанатына қатысты.
Жаңа вокзал кешені мен оның төңірегін абаттандыру Мемлекет басшысы Қасым-Жомарт Тоқаевтың тапсырмасына сәйкес, теміржол инфрақұрылымын жаңғыртуға бағытталған мемлекеттік бағдарлама аясында жүзеге асырылды. Құрылыс-монтаж жұмыстарын «Zangar SG» ЖШС орындаған.
Өңір басшысы Нұрдәулет Қилыбай өз сөзінде бұл нысанның аудан үшін стратегиялық маңызын атап өтіп, жаңа вокзал өңірдің өзіндік көлік визит картасына айналатынын және халыққа заманауи сапа мен қауіпсіздік талаптарына сай қызмет көрсететінін жеткізді.
Нысанның негізгі көрсеткіштері мен өзгерістері:
Аумағы: Вокзал ғимаратының аумағы 5 есеге ұлғайып, 201,2 шаршы метрден 1 103 шаршы метрге жетті;
Өткізу қабілеті: Тәулігіне 100 жолаушыдан 200 жолаушыға дейін екі есеге артты;
Инфрақұрылымы: Инженерлік желілер толық жаңартылып, ауданы 2 100 шаршы метр болатын жаңа перрон салынды;
Қолайлылық: Ерекше қажеттіліктері бар азаматтар үшін тактильді тақталар төселіп, заманауи навигация элементтері орнатылды.
Айта кетейік, бұл жоба республика бойынша жаңғыртылып жатқан 125 теміржол вокзалының бірі болып табылады. Қазіргі уақытта Маңғыстау облысында «Шетпеден» бөлек, «Маңғыстау» және «Бейнеу» вокзалдарын қайта жаңарту жұмыстары да жалғасып жатыр.