В Атырау +34.1 
2026 жылдың алғашқы жартыжылдығында Қазақстанда жүк және жолаушылар тасымалының көлемі артты.
Барлық көлік түрімен 979,4 млн жолаушы тасымалданды, бұл өткен жылдың сәйкес кезеңімен салыстырғанда 5,5%-ға көп. Жолаушылар айналымы 5,1%-ға өсіп, 45,3 млрд жолаушы-километрге жетті.
Жолаушылар тасымалының негізгі үлесі дәстүрлі түрде автомобиль көлігіне тиесілі болды – 962,7 млн адам. Сонымен қатар, теміржол көлігін 9,2 млн, әуе көлігін 7,4 млн, теңіз көлігін 14 мың жолаушы пайдаланған. Алты ай ішінде жолаушылар тасымалынан түскен кіріс 0,8 млрд теңгені құрады.
Аймақтар бойынша ең жоғары өсім Қостанай облысында тіркелді – 62,7%. Сондай-ақ Алматы қаласында – 22,3%, Ақмола облысында – 20,6%, Шымкентте – 19,2% өсім байқалды. Алматы облысында көрсеткіш 15,8%-ға, Қарағандыда – 14,2%-ға, Жетісуда – 13,6%-ға, Батыс Қазақстанда – 10%-ға артты. Жамбыл мен Солтүстік Қазақстан облыстарында өсім 8,9%, Ақтөбеде – 4,6%, Абай облысында – 2,3% болды.
Жүк тасымалы да оң динамика көрсетті. Қаңтар-маусым қорытындысы бойынша жүк айналымы өткен жылдың сәйкес кезеңімен салыстырғанда 2%-ға өсіп, 255,8 млрд тонна-километрге жетті.
Жүк айналымының ең жоғары өсімі Жетісу облысында – 16,3% және Абай облысында – 12,2% тіркелді. Қызылорда облысында көрсеткіш 8,7%-ға, Астанада – 8,5%-ға, Ақтөбеде – 6,9%-ға, Түркістанда – 5,8%-ға, Ақмолада – 4,9%-ға, Ұлытауда – 4,6%-ға, Шығыс Қазақстанда – 2,5%-ға артты. Батыс Қазақстан, Жамбыл және Маңғыстау облыстарында өсім 1,9%-дан, Алматы қаласында – 0,4%, Қостанайда – 0,2% болды.