Тоқаев Қазақстанның Ұлыбритания, Өзбекстан және Румыниядағы елшілерін тағайындады

Президент Қасым-Жомарт Тоқаев Қазақстанның дипломатиялық корпусындағы кадрлық тағайындаулар мен қызметтен босату туралы жарлықтарға қол қойды.

Ақорда жариялаған құжаттарға сәйкес:

• Ералы Тұғжанов Қазақстан Республикасының Өзбекстан Республикасындағы Төтенше және Өкілетті Елшісі болып тағайындалды. Бұл қызметте ол лауазымынан босатылған Бейбіт Атамқұловтың орнына келді;
• Әлібек Бақаев Қазақстанның Ұлыбритания және Солтүстік Ирландия Біріккен Корольдігіндегі Төтенше және Өкілетті Елшісі болып тағайындалды. Осыған байланысты ол бұрынғы қызметінен босатылды;
• Амангелді Саинов Қазақстан Республикасының Румыниядағы Төтенше және Өкілетті Елшісі болып тағайындалды. Бұған дейін бұл қызметті Ерлік Әли атқарған.

Ералы Тұғжанов әр жылдары Қазақстан Республикасы Премьер-Министрінің орынбасары, Маңғыстау және Ақтөбе облыстарының әкімі қызметтерін атқарды. Сондай-ақ Қазақстан халқы Ассамблеясы мен Қазақстан кәсіподақтар федерациясын басқарған.

Жаңа тағайындауға дейін Әлібек Бақаев Қазақстан Республикасы Сыртқы істер министрлігінің басшылық құрамында жұмыс істеп, Сыртқы істер министрінің орынбасары қызметін атқарды. Сонымен қатар Қазақстанның Швейцария мен Лихтенштейндегі дипломатиялық миссияларын басқарды.