Әйелін көңілдесімен ұстап алған: Атырауда 2,5 млн теңге бопсалаудың себебі белгілі болды

Атырау облысының Индер ауданында 35 жастағы ер адамға қатысты 2,5 млн теңге талап ету ісінің мән-жайы белгілі болды.

«Ақ Жайық» дереккөзінің мәліметінше, ер адам әйелін көңілдесімен ұстап алған. Сол кезде қарсыласымен жанжал туып, күйеуі оны ұрып жіберген. Кейін ол одан моральдық шығын ретінде 2,5 миллион теңге талап еткен.

Көңілдес талапты орындаудан бас тартып, полицияға жүгінді. Осыдан кейін құқық қорғау органдары жедел шаралар жүргізді: шағымданушыға қажетті соманы беріп, күдіктімен кездесу белгіледі.

Ақша беру кезінде ер адам Привокзальный ықшамауданында қылмыс үстінде ұсталды. Тінту барысында оның жанынан 2,2 миллион теңге тәркіленді.

Күдіктіге қатысты «қорқытып ақша талап ету» бабы бойынша сотқа дейінгі тергеу басталды. Тергеу мүддесіне байланысты істің басқа мән-жайлары ресми түрде жарияланбай отыр.

Анастасия ШЕРСТЯНКИНА