​Қазақстанда бір айда 168 мыңға жуық автокөлік есепке қойылды

2026 жылдың маусым айында Қазақстанда 167 878 автокөлік құралы есепке қойылды, деп хабарлады Ұлттық статистика бюросы.

Мамыр айымен салыстырғанда бұл көрсеткіш 13,7%-ға артқан (мамырда 147 668 көлік тіркелген болатын).

Маусым айында тіркелген көліктің басым бөлігін жеңіл автомобильдер құрады — 87,4%. Жүк көліктерінің үлесі — 5,7%, тіркемелер — 2,4%, мотоциклдер — 1%, автобустар — 0,9%, ал басқа да автокөлік құралдары — 2,6% болды.

Маусымда есепке қойылған машиналардың ішінде қозғалтқыш көлемі 1500-ден 2000 текше сантиметрге дейінгі көліктер жиі кездесті. Олардың үлесі тіркелген көліктердің 34,5%-ын құрады.

Жанармай түрі бойынша бензинмен жүретін автомобильдер көш бастап тұр. Маусымда осындай 136 232 көлік тіркелді, бұл жалпы санның 81,1%-ы. Сондай-ақ дизель отынымен — 10 845, аралас жанармаймен (газ-бензин) — 11 183, ал электр қуатымен жүретін 2 872 электрлі көлік тіркелген.

2026 жылғы 1 шілдедегі жағдай бойынша Қазақстанда 6 млн 25,9 мың автокөлік құралы тіркелген. Оның ішінде 5 млн 53,7 мыңы — жеңіл автомобильдер.

Елдегі автопарктің ең көп шоғырлануы Алматы қаласында (733,3 мың көлік) және Алматы облысында (646,3 мың көлік) тіркелді.