В Атырау +24.1 
АХҚО соты «Нафтогаз Украины» ҰАК мен «Газпром» ЖАҚ арасындағы істі қарады. Шешімді судья Лорд Фолкс 2026 жылғы 7 шілдеде шығарды.
Бұған дейін, 2026 жылғы 15 мамырда судья Эндрю Спинк Халықаралық сауда палатасының (ICC) халықаралық арбитраж соты аясында 2025 жылғы 16 маусымда қабылданған арбитраж шешімін тану және орындау туралы бұйрық шығарған еді. Ол бұйрық бойынша жауапкерге талапкерге арбитраж шешімімен белгіленген соманы пайыздарымен және сот шығындарымен бірге төлеу міндеттелген болатын. Сонымен қатар «Газпромға» бұл бұйрықты жою туралы өтінішпен сотқа жүгіну құқығы берілген.
Жаңа қараудағы негізгі мәселе – АХҚО сотының юрисдикциясы ICC арбитраж шешімін тануға және орындауға тарала ма деген сұрақ болды. Себебі арбитраж орны Швейцарияда болған, ал Қазақстанда немесе МФЦА Халықаралық арбитраж орталығында емес.
Сот тараптардың уәждерін тыңдап, АХҚО туралы Конституциялық заңның 13 және 14-баптарын талдады. Шешімде «Нафтогаз» бен «Газпром» арасындағы дау АХҚО сотының юрисдикциясына жатпайтыны көрсетілді. Сондай-ақ тараптар ICC регламенті бойынша арбитражға келісім бергенімен, АХҚО сотының юрисдикциясына келісім бермегені атап өтілді.
Соттың пікірінше, арбитраж шешімдерін тану және орындау ережелері әлемдегі кез келген арбитраж құрамымен шығарылған барлық шетелдік шешімдерге қолданылмайды.
Нәтижесінде Лорд Фолкс судья Спинктің бұйрығын жойды. Тараптарға сот шығындары немесе басқа процессуалдық мәселелер бойынша жазбаша ұстанымдарын 14 күн ішінде ұсыну міндеттелді.
Бұл шешім болашақта тараптар АХҚО сотын шетелдік арбитраж шешімдерін тану және орындау үшін пайдалануға тырысқан жағдайларда маңызды мәнге ие болуы мүмкін.