В Атырау +21.8 
Қазақстанның Қаржы министрлігі өздерінің ақпараттық жүйелерінен азаматтардың деректері таралды деген ақпаратты теріске шығарды. Бұл туралы вице-министр Ержан Біржанов мәлімдеді.
Ресми ақпарат беруге @AQOSlive Telegram-арнасы авторының қойған сұрағы себеп болды. Журналист алаяқтардың кәсіпкерлердің оңайлатылған салық режимінен жалпыға бірдей белгіленген режимге өткен нақты күндерін қайдан біліп алатынын және бұны алдау үшін қалай пайдаланатынын сұраған еді.
Біржановтың айтуынша, ведомство бақылаудың бірнеше кезеңін, соның ішінде деректер базасына қол жеткізу трафигінің қатаң мониторингін енгізген.
«Тіпті, гипотетикалық түрде деректер сыртқа кеткен күннің өзінде оларды оқу мүмкін емес — олар көпдеңгейлі шифрмен қорғалған», — деп сендірді вице-министр.
Шенеунік сонымен қатар бизнесмендерге жасалатын қоңыраулардың жаппай сипатта екеніне күмән келтіріп, оларды «бірлі-жарым жағдайлар» деп атады. Біржановтың пікірінше, қаскөйлер ақпаратты басқа, бөгде көздерден алған болуы мүмкін немесе бұл алаяқтардың өздерінің жоғары технологиялық жабдықталуының нәтижесі.