В Атырау +22.3 
Атырауда ҚР ИІМ Ұлттық ұланының 5546 әскери бөлімінің әскери қызметшілері Қылмыстық-атқару жүйесі комитетінің қызметкерлерімен бірлесіп, №15 ҚАЖ мекемесінің аумағына тыйым салынған заттарды заңсыз кіргізу әрекетінің жолын кесті.
Оқиға колонияның көлік өтетін бақылау-өткізу пунктінде «Газель» автокөлігін тексеру кезінде орын алған.
Көлікті тінту барысында әскери қызметшілер «Шах» есімді қызметтік-іздестіру итін пайдаланды. Төрт аяқты көмекші көліктің салонында тыйым салынған заттардың болуы мүмкін екенін сезіп, бірден белгі берген.
Қызметтік иттің иісшілдігінен кейін құқық қорғаушылар автокөлікке мұқият тексеру жүргізді.
Тексеріс нәтижесі: Тінту жұмыстарының қорытындысында көліктің қолғап салатын жәшігінен (бардачок) шпатлевкадан босаған пластикалық құты табылды.
Табылған зат: Құтының ішіне өзіне тән өзгеше иісі бар, өсімдік тектес зат түйілген сәлемдеме жасырылғаны анықталды.
Ұлттық ұлан өкілдері әскери қызметшілер мен ҚАЖК қызметкерлерінің жедел әрі үйлесімді әрекетінің арқасында ерекше режимдегі нысанға тыйым салынған заттарды жеткізу әрекеті дер кезінде тоқтатылғанын атап өтті.
Қазіргі уақытта аталған дерек бойынша ресми тексеру амалдары жүргізіліп жатыр. Оқиғаның барлық мән-жайы мен заңбұзушылыққа қатысы бар тұлғалар анықталу үстінде.