В Атырау +24.1 
Атыраудағы құқық қорғау органының қызметкері әлеуметтік желідегі жарияланымдарына байланысты дауға ілікті, деп хабарлайды Криминальный Казахстан.
Ол ресми тергеу іс-шаралары кезінде түсірілген фото мен видеоларды жеке аккаунттарында жариялап қана қоймай, азаматтарға қатысты бейәдеп әрі қорлайтын сөздер қолданған. Желіде адамдарды «шакалдар» және басқа да балағат сөздермен атаған жазбалары қоғамда үлкен наразылық туғызды.
Жергілікті тұрғындардың бірі мұндай әрекеттің полиция формасын киген адамға мүлде жараспайтынын айтып, Ішкі істер министрлігіне ресми шағым түсірді.
Атырау облыстық полиция департаменті бұл оқиғаға жедел әрекет етіп, қызметтік тексеріс жүргізді. «Қызметтік этика мен тәртіпті өрескел бұзғаны үшін қызметкерге тәртіптік жаза қолданылды. Сонымен қатар, жеке құрам арасында интернеттегі мінез-құлық ережелерін сақтау жөнінде қосымша түсіндіру жұмыстары жүргізілді», – деп хабарлады департаменттің баспасөз қызметі.
Қызметкерге нақты қандай жаза берілгені (ескерту немесе қатаң сөгіс) айтылмағанымен, ведомство кез келген орынсыз әрекетті қатаң түрде тоқтататынын мәлімдеді.