Атырауда бір ай бойы Жайық өзенінде әуесқой балық аулауға тыйым салынады

15 мамыр мен 15 маусым аралығында Атырау облысында өзен бойында әуесқойлық және спорттық балық аулауға уақытша тыйым салынады.

Шектеулер балықтың уылдырық шашу кезеңіне байланысты енгізіліп отыр.

Жайық-Каспий облысаралық бассейндік балық шаруашылығы инспекциясының хабарлауынша, бұл тыйым ҚР Ауыл шаруашылығы министрінің «Балық ресурстары мен басқа да су жануарлары объектілерін пайдалануға шектеулер мен тыйымдар енгізу туралы» №78 бұйрығына сәйкес жыл сайын қолданылады.

Шектеулер тек Жайық өзенінің учаскелеріне ғана емес, оның арнасымен жалғасқан Приморский мен Зарослый каналы, Бақсай және Безымянный каналдарына да қатысты.

Сондай-ақ, тыйым Махамбет және Индер аудандарының басқа да су айдындарына қолданылады.

Инспекция өкілдері уылдырық шашу кезеңінде «кешкісін қармақпен отыру» әрекеттері әкімшілік жауапкершілікке әкеп соғуы мүмкін екенін ескертеді.

Айнұр САПАРОВА