​Каспийдегі жобалар тоқтап тұр: ҚМГ мен «Лукойл» қаржыландыру жолдарын іздестіруде

«ҚазМұнайГаз» ұлттық компаниясы мен ресейлік «Лукойл» Қаламқас-теңіз және Хазар жобаларын жүзеге асыру үшін қаржыландыру көздерін қарастыруда.

Бұл туралы ТАСС ҚМГ басқарма төрағасы Асхат Хасеновке сілтеме жасап хабарлады.

Оның айтуынша, тараптар банктермен ықтимал тетіктерді талқылап, жобаны санкциялық шектеулер жағдайында жалғастыруға жол іздеуде.

Хасенов атап өткендей, жаңа серіктес іздеу жоспарда жоқ, ал ҚМГ әрекеттерін санкциялық режим мен құқықтық алаң аясында жүргізіп отыр. Бұған дейін компания жобалау кезеңінен кейін Қаламқас-теңіз бен Хазар бойынша жұмыстарды уақытша тоқтатқанын хабарлаған еді.

Жоба екі компанияның тең үлесімен (50/50) жүзеге асырылуда, оператор — Kalamkas-Khazar Operating бірлескен кәсіпорны. Алдын ала бағалаулар бойынша, кен орындарындағы көмірсутек қоры шамамен 238,1 млн тонна.