Тоқаев: Қазақстанда гуманитарлық мамандықтардың орнына техникалық білімге басымдық беру керек

Қазақстан Президенті Қасым-Жомарт Тоқаев қоғамдық сана мен білім беру басымдықтарын терең трансформациялау қажеттігі туралы мәлімдеді. Оның пікірінше, елде гуманитарлық мамандарды жаппай дайындаудан техникалық мамандарға басымдық беруге көшу қажет.

Аль-Фараби атындағы ҚазҰУ-да ғылыми қоғамдастықпен кездесуінде мемлекет басшысы ағымдағы жылды Қазақстанда Цифрландыру және жасанды интеллект жылы деп жарияланғанын еске салды. Президент республиканың ғылым, техника және күрделі өндірістік процестер бағытына эволюциялануы тиіс екенін атап өтті.

Мемлекет басшысы қазақстандық жастардың мамандық таңдауда алған бағыттарына сыни пікір білдірді.

- Менің ойымша, бізде заңгерлер, филологтар мен дипломаттар, яғни, гуманитарлық сала мамандары өте көп. Ұлттың менталитетін өзгертуіміз керек. Ал ол қалай өзгереді? Ол үшін ғылым мен технологияға мойын бұруымыз қажет. Бұл біздің қолымыздан келмей ме? Қазақстанда тура мағынасында сана революциясын жасауымыз керек деп ойлаймын, деп мәлімдеді Қасым-Жомарт Тоқаев.

Президент осы орайда университеттердің ерекше миссиясын атап өтті. Олар білімді, парасатты, елдің келешегі үшін жауапкершілік арқалай алатын азаматтардың жаңа буынын тәрбиелеп шығаруда айрықша рөл атқарады. Мемлекеттің зияткер қауымы университет қабырғасында қалыптасады. Білім беру саласын әлеуметтік қызмет ретінде қабылдау дұрыс емес. 

Президенттің айтуынша, қазіргі құбылмалы әлемде білім маңызды өндірістік күшке айналды. Жастарымыздың ғылымға, инновациялық кәсіпкерлікке, озық цифрлық дағдыларды меңгеруге қызығушылық танытатыны қуантады. Мемлекеттің міндеті – жастарды сапалы біліммен қамтамасыз ету, олардың заманауи ғылыми базада жұмыс істеуіне, дүние жүзімен академиялық байланыс орнатуына жағдай жасау. 

Көп ұзамай Жасанды интеллект университеті ашылады. Оқу орны алғашқы студенттері мен магистранттарын биыл қабылдауды жоспарлап отыр. Іргелі ғылымсыз жасанды интеллектіні дамыту мүмкін емес екенін түсінген жөн екенін атап өтті мемлекет басшысы.  

- Алгоритмдер мен күрделі инженерлік өнімдер, ең алдымен, дамыған ғылыми және университеттік ортада пайда болады. Сол себепті осы бағытқа айрықша көңіл бөлеміз, – деді Президент.