В Атырау -10 
Алматыдағы аяусыз шабуылдан кейін «КазТАГ» агенттігінің басшысы Әсет Матаевтың қайда екені белгісіз күйде қалып отыр.
Elmedia басылымының хабарлауынша, Матаев ауыр соққыдан кейін ауруханаға жеткізілгенімен, оның адвокаттары Рена Керимова мен Елена Жигаленок әлі күнге дейін нақты қай медициналық мекемеде жатқанын біле алмай отыр. Полиция департаменті мен аудандық басқарма бұл ақпаратты бермеген.
Қорғаушылардың айтуынша, жарақат алған адамның орналасқан жерін заңды өкілдерінен жасыру — процессуалдық нормаларды өрескел бұзу. Әсіресе Матаевтың жағдайы ауыр екенін ескерсек, медициналық көмектің ашық әрі қолжетімді болуы аса маңызды.
Адвокаттар оның басынан ашық жарақат, маңдай сүйегі қуысының қабырғалары сынғаны, гемосинус және маңдай аймағында жарақат алғанын мәлімдеді.
Қақтығыс кезінде Матаев пен оның досы Уәлиханға 5–6 адам шабуыл жасаған. Қорғаушылардың нұсқасы бойынша, олар монтировка қолданған.
Elmedia атап өткендей, оқиға болған Dostyk Plaza маңында көптеген бейнабақылау камералары орнатылған. Басылымның пікірінше, бұл жазбалар оқиғаның нақты хронологиясын қалпына келтіруге және шабуылға қатысушыларды анықтауға көмектесуі мүмкін.