Ана мен нәресте құқығы қорғалды

Астана қаласы Нұра ауданының прокуратурасы денсаулық сақтау және балалардың құқықтарын қорғау саласында заң бұзушылықтарды анықтады.

«Халық денсаулығы және денсаулық сақтау жүйесі туралы» Кодекстің 5-бабына сәйкес, мемлекет ана мен баланы қорғауға және тегін медициналық көмектің кепілдік берілген көлемін қамтамасыз етуге міндетті.

Алайда тексеру барысында перзентханадан шыққан 1 150 ана мен нәрестеге арналған тегін «дәрі-дәрмек қобдишасы» берілмегені белгілі болды.

Прокурорлық қадағалау нәтижесінде бұл олқылықтар жойылып, барлық тиісті жиынтықтар таратылды. Жауапты лауазымды тұлғалар тәртіптік жауапкершілікке тартылды.

Азаматтардың құқықтарын қорғау мәселесі прокуратура органдарының тұрақты бақылауында.