Қазақстанда жұмыскерлердің еңбек құқықтарын қорғау күшейтіледі

Мәжіліс депутаттары еңбек заңнамасын жетілдіруге бағытталған заң жобасын бірінші оқылымда мақұлдады. Құжат жұмыскерлердің құқықтық кепілдіктерін арттыруға және еңбек қатынастарын реттеудің бірқатар рәсімдерін нақтылауға бағытталған.

Заң жобасында бірнеше маңызды түзетулер қарастырылған:

• Еңбек саласында қызметкерлердің ар-намысы мен қадір-қасиетін қорғау жөніндегі нормаларды енгізу ұсынылады.
• Уақытша еңбекке жарамсыздық немесе әлеуметтік демалыс кезеңімен сәйкес келген жағдайда соңғы жұмыс күнін айқындау тәртібі нақтыланады.
• Ауысым алдындағы медициналық куәландырудан өтуге жұмсалған уақытты төлеу қарастырылған. Оның мөлшері ұжымдық шарт немесе жұмыс берушінің актісі арқылы белгіленеді.
• Жұмыс беруші еңбек жағдайлары өзгергені туралы қызметкерді міндетті түрде жазбаша хабардар етуге тиіс болады.
• Қызметкердің бастамасы бойынша еңбек шартын бұзу тәртібі нақтыланып, материалдық жауапты тұлғалар үшін еңбек қатынастарының тоқтатылу күні мен жұмыс берушінің мүлкін қабылдау-тапсыру рәсімі айқындалады.

Бұл түзетулер еңбек қатынастарын әділ әрі ашық жүргізуге, жұмыскерлердің заңды мүдделерін қорғауға және еңбек дауларының алдын алуға бағытталған.