В Атырау -10 
Ақтөбе облысында бес адамның өмірін қиған жан түршігерлік жол апатының мән-жайы белгілі болды. Қаза тапқандардың барлығы бір ауылдың тұрғындары, олардың арасында ерлі-зайыптылар мен олардың кішкентай немересі бар, деп хабарлайды «Диапазон».
Қайғылы оқиға 17 наурызда Ақтөбе — Атырау жолында, Қарауылкелді ауылына жақын маңда болған. Жолда «ВАЗ» жеңіл автокөлігі мен DAF жүк көлігі соқтығысқан. Соққының қатты болғаны соншалық, жеңіл көліктің жүргізушісі мен оның төрт жолаушысы медицина қызметкерлері келгенше оқиға орнында көз жұмған.
Жергілікті әкімдік растағандай, жол апатына ұшыраған азаматтың бәрі — Темір ауданы Тасқопа ауылының тұрғындары. Қаза тапқандардың арасында төрт жасар немересін үйіне апара жатқан қарт ерлі-зайыптылар бар. Бүлдіршін ата-әжесінің үйінде қонақта болған.
«Өте өкінішті, апаттан біздің Кеңқияқ дене шынықтыру-сауықтыру кешені волейбол жаттықтырушысының ата-анасы мен қызы қаза тапты. Бүлдіршін шамамен 4 жаста еді. Туған-туыстары мен жақындарына қайғырып көңіл айтамыз», — деп бөлісті отбасының таныстары.
Зардап шеккен адамның жағдайы: Соқтығысу салдарынан бір адам — 33 жастағы ер адам аман қалды. Қазір ол Байғанин аудандық орталық ауруханасының жансақтау бөлімінде өте ауыр жағдайда жатыр. Облыстық денсаулық сақтау басқармасының мәліметінше, ол комада, жергілікті дәрігерлерге көмекке санавиация мамандары жіберілді.
Өңірлік Полиция департаменті жол-көлік оқиғасы дерегі бойынша сотқа дейінгі тергеу басталғанын хабарлады. Тәртіп сақшылары оқиғаның барлық мән-жайын анықтап жатыр және жүргізушілерді қала сыртындағы жолдарда жылдамдық режимі мен қауіпсіздік шараларын қатаң сақтауды тағы да ескертеді.