В Атырау -10 
Ауғанстан Кабулдағы ауруханаға жасалған шабуылдан 400 адамның қаза тапқанын мәлімдеді, Пәкістан айыптауларды жоққа шығарды, деп хабарлайды АА.
Ауғанстан әкімшілігінің өкілі Хамдулла Фитраттың айтуынша, Пәкістан әуе күштері Кабулдағы нашақорларды емдеу орталығына соққы беріп, салдарынан 400 адам қаза тауып, шамамен 250 адам жарақат алған.
Фитрат әлеуметтік желідегі парақшасында Пәкістан жергілікті уақытпен сағат 21:00-де 2000 орындық ауруханаға әуе шабуылын жасағанын жазды. Оның айтуынша, аурухананың елеулі бөлігі қираған.
Пәкістан айыптауларды жоққа шығарды
Ақпарат министрі Аттаулла Тарардың мәлімдеуінше, Кабул мен Нангархарда «әскери нысандар мен оқ-дәрі қоймалары» жойылған. Ол соққыдан кейінгі екінші жарылыстардың оқ-дәрі қоймаларының бар екенін дәлелдейтінін айтты. Министр операциялар «мақсаттарға қол жеткізілгенге дейін жалғасатынын» мәлімдеді.
Пәкістан билігі бұған дейін де Кабулдағы ауруханаға шабуыл жасалғаны туралы Ауғанстан өкілдерінің мәлімдемесін «шындыққа сәйкес келмейді» деп жариялаған болатын.
Қақтығыстың өршуі
22 ақпанда Пәкістан «Техрик-и-Талибан Пәкістан» қозғалысына тиесілі деп сипатталған нысандарға соққы бергенін хабарлады. 26 ақпанда Ауғанстан да шекара бойындағы пәкістандық әскери нысандарға шабуыл жасады. Бұдан кейін Исламабад Кабул мен шекара маңындағы аймақтарға жаңа соққылар жасады.
2025 жылдың күзінде де екі ел арасында осындай шиеленіс болған. Қарашада Стамбулда тараптар атысты тоқтату жөнінде келіссөз жүргізгенімен, нәтиже шықпаған. Пәкістан билігі ТТП содырлары Ауғанстан аумағында жасырынғанын айтса, Кабул бұл айыптауларды жоққа шығарып келеді.