В Атырау -10 
Қала тұрғыны аулада көлігін жуып жатқан кезде оған полиция көлігі келіп тоқтап, патрульдік қызметкер есірткі бизнесімен күрес басқармасынан «бағыттама» бар екенін айтқан. Азаматты қызметтік көлікке отырғызып, наркологияға жеткізген.
Медициналық тексеру оның марихуана қолданғанын көрсетті. Бірақ мәселе мұнда емес еді.
Іс материалдарына сәйкес, полицей қылмыстық істің тіркелуіне жол бермей, наркологиялық есепке қоюдан «құтқара» алатынын мәлімдеген. Наркология алдында тұрған қызметтік көлікте ол күдіктінің жұбайына телефон экранында «мәселенің шешімі» 10 миллион теңге деп көрсеткен.
Әйел бұл сомадан қатты шошып, отбасы үшін мұндай ақша қолжетімсіз екенін айтқан. Саудаласу басталды. Ақырында полицей «жаны ашып», соманы 700 мың теңгеге дейін түсірген.
Отбасы туыстарынан қарыз алып, ақшаны көрсетілген есепшотқа бірден аударған.
Бірнеше күннен кейін сол патрульдік қызметкер қайта хабарласып, мәселе әлі жабылмағанын айтып, соманы 1 миллион теңгеге дейін көбейтуді ұсынған. Отбасы осымен мәселе жақсы шешіліп кетер деген үмітпен келісіп, тағы 300 мың теңге несие рәсімдеген.
Алайда біраз уақыттан соң ер адамды наркологиялық есепке қойғаны белгілі болды. Бұл жолы алданған ол шыдамай, құқық қорғау органдарына шағымданды.
Тексеру барысында ешқандай ресми «бағыттама» болмағаны анықталды. Полицей азаматтың көлігін сүртіп жүріп, шөп шегіп тұрғанын ғана көрген.
Айта кету керек, патрульдік полиция қызметкерлерінің есепке қою немесе істі тіркеу мәселесін «шешуге» ешқандай өкілеттігі жоқ.
Сотта полицей кінәсін мойындамады. Ол ақшаны талап етпегенін, тек қарызға алғанын және қайтаруды жоспарлағанын айтты. Бірақ сот оған сенбеді және әрекетін қызметтік жағдайды пайдаланып жасалған алаяқтық деп таныды.
Сот оған 12 миллион теңге көлемінде айыппұл салды. Қамауда және үйқамақта өткізген уақыт есепке алынған соң, түпкілікті сома 10 миллион 631 мың теңге болып бекітілді.
Полицей полицияның аға лейтенанты шенінен және мемлекеттік қызметте өмір бойы жұмыс істеу құқығынан айырылды.
Анастасия ШЕРСТЯНКИНА