Атырауда 15 наурыз​ күні автобустар тегін қатынайды

15 наурызда өтетін референдум күні Атырау қаласында қоғамдық көліктер жолаушыларды тегін тасымалдайды.

Бұл туралы қалалық кәсіпкерлік және ауыл шаруашылығы бөлімі хабарлады.

Әкімдік баспасөз қызметінің мәліметінше, автобустар қалыпты режимде таңғы 06:00-ден түнгі 23:00-ге дейін қатынайды. Қалаішілік және қала маңына қатынайтын барлық бағыттарда жол жүру ақысыз болады.

— Осылайша, қала тұрғындары мен қонақтары күні бойы автобустарды тегін пайдалана алады. Мұндай шара азаматтардың саяси науқанға белсенді қатысуына қолайлы жағдай жасау мақсатында ұйымдастырылып отыр, — деді қала әкімдігінің баспасөз хатшысы Еркеназ Қалижан.

Сонымен қатар, инватакси қызметі де штаттық режимде жұмысын жалғастырады.