В Атырау -10 
Қазақстандық боксшы Жәнібек Әлімханұлы орта салмақтағы IBF нұсқасы бойынша әлем чемпионы титулынан айырылды.
Бұл туралы Қазақстан кәсіпқой бокс федерациясының президенті Рақымжан Ерденбеков мәлімдеді. Белбеуден айыру туралы ақпаратты бейінді бокс басылымдары да растады.
Ерденбековтің айтуынша, IBF қазақстандық тарапқа Әлімханұлының 2026 жылдың 2 желтоқсанына дейін жекпе-жектерден шеттетілгенін хабарлаған. Сонымен қатар, ұйым ережесі бойынша чемпион тоғыз ай ішінде титулын міндетті түрде қорғауы тиіс. Жәнібектің жағдайында бұл мерзім 2026 жылдың 4 шілдесінде аяқталуы керек еді, сондықтан 5 наурызда IBF директорлар кеңесі титулды дереу бос деп жариялау туралы шешім қабылдады.
The Ring басылымының жазуынша, IBF шешіміне допинг дауы негіз болған: ұйым мельдонийге жасалған тест оң нәтиже көрсеткеннен кейін өз ережелерінің бұзылғанын алға тартты. BoxingScene де титулдан айыру антидопинг ісі бойынша салынған санкциялармен және белбеуді қорғау міндеттемелерін уақтылы орындай алмауымен байланысты екенін хабарлады.
Ерденбеков бұл жағдайды Әлімханұлының командасы үшін үлкен сабақ деп атады, бірақ боксшы үлкен рингке биылдың өзінде оралуды жоспарлап отырғанын жеткізді. Оның айтуынша, спортшының тарапы IBF шешіміне апелляция бермекші.
Бұған дейін WBO ұйымы Әлімханұлына чемпиондық белбеуін сақтап қалуға рұқсат бере отырып, оны бір жылға шеттеткен болатын. Сондай-ақ, Дензел Бентли мен Эндри Сааверда арасында уақытша титул үшін жекпе-жек тағайындады.
Бұдан бөлек, Жәнібек Әлімханұлының ағзасында мельдоний қалай пайда болғаны да белгілі болды.