​Солтүстік Корея Қытаймен жолаушылар тасымалын қайта жандандырды

Солтүстік Корея мен Қытай 2020 жылы пандемияға байланысты тоқтатылған тұрақты теміржол қатынасын ресми түрде қайта жандандыруда. Алғашқы жолаушылар пойызы ертең, 12 наурызда жолға шығады, деп хабарлайды Reuters.

Бейжіңдегі ресми билет кассаларының хабарлауынша, алғашқы рейске деген сұраныс өте жоғары болған — Қытай астанасынан Пхеньянға баратын пойыздың барлық билеттері жөнелту күніне дейін толық сатылып кеткен.

Алғашқы жолаушылар кімдер?

Агенттік мәліметінше, алғашқы вагондардан қарапайым туристер емес, «ерекше» санаттағы азаматтар орын алған. Тапшы билеттерге ие болғандардың қатарында:

• ірі кәсіпкерлер;
• мемлекеттік шенеуніктер;
• аккредиттелген журналистер бар.

Рейстер кестесі

Жаңартылған кестеге сәйкес, қатынас тұрақты негізде жүзеге асырылады:

• Бейжің – Пхеньян пойызы аптасына төрт рет (дүйсенбі, сәрсенбі, бейсенбі, сенбі) қатынайды.
• Дандун – Пхеньян бағыты бойынша құрамдар күн сайын жүреді.

Қытайдың теміржол басқармасы бұл бағыттардың қайта ашылуы елдер арасындағы сауда, экономика және туризмнің дамуына қуатты серпін беріп, «өзара игілік пен достықты» нығайтатынын атап өтті.

Туризм мәселесі шешімін күтіп тұр

Пойыздар іске қосылғанымен, КХДР әлі де әлемдегі ең жабық елдердің бірі болып қала береді. Туристік агенттіктер шетелдіктердің көбі үшін кіру мүмкіндігі әлі де шектеулі екенін айтады. Тек арнайы келісімдер бойынша саяхаттайтын Ресейден келетін ұйымдасқан топтар ғана бұған жатпайды.

Пандемияға дейін Солтүстік Кореядағы туристер ағынының негізгі бөлігін Қытай азаматтары құраған болатын. Шекараның қазіргі ашылуы аймақтағы жаппай туризмнің қайта оралуына жасалған алғашқы қадам болады деп күтілуде.