В Атырау -10 
Өткен жылдың соңында бірқатар БАҚ-та хакерлер Қазақстандағы мемлекеттік органдардың серверлерін бұзып, шамамен жарты жыл бойы құпия деректерге қол жеткізгені туралы ақпарат тараған еді. Бұл мәселеге Жасанды интеллект және цифрлық даму министрлігі түсініктеме берді, деп хабарлайды Tengrinews.kz.
Жарияланымдарда Кибершабуылдарды талдау және тергеу орталығының деректеріне сілтеме жасалып, белгісіз хакерлер бірнеше мемлекеттік органның цифрлық жүйелеріне жасырын түрде кіргені айтылған. Мәліметтерге сәйкес, электрон пошта серверлері, домендік контроллерлер және жоғары деңгейдегі қолжетімділігі бар жұмыс станциялары бұзылған болуы мүмкін. Сарапшылар қызметтік хат-хабарлар сыртқа тарауы ықтимал екенін және мұндай кибершабуылдың салдары ауқымды болуы мүмкін екенін де атап өткен.
Министрлік не дейді?
Аталған жағдайға байланысты редакция Жасанды интеллект және цифрлық даму министрлігіне ресми сұрау жолдаған. Ведомствоның мәліметінше, Кибершабуылдарды талдау және тергеу орталығы жариялаған материалдардағы кибероқиғалар туралы ақпарат уәкілетті мемлекеттік органдарға белгілі.
Министрлік бұл есеп заманауи киберқауіптер туралы хабардарлықты арттыру және ақпараттық қауіпсіздік шараларын күшейту мақсатында дайындалғанын мәлімдеді. Ведомствоның хабарлауынша, тіркелген сигналдар белгіленген тәртіппен талданып, оқиғалар мен олардың ықтимал салдарына бағалау жүргізілген.
Сонымен қатар кейбір тексеру және талдау жұмыстары әлі жалғасып жатқандықтан, соңғы қорытындылар тек тексеру аяқталғаннан кейін жасалатыны айтылды.
Жеке деректер тарады ма?
Министрлік қай мемлекеттік органдардың серверлері бұзылғаны туралы нақты мәлімет бермеді. Бұл ақпарат шектеулі таралымға жататыны және оны жариялау ақпараттық қауіпсіздікке қосымша қауіп тудыруы мүмкін екені атап өтілді.
Ведомство тексеру барысында қазақстандықтардың жеке деректерінің жаппай таралу фактісі расталмағанын да мәлімдеді. Қызметтік ақпараттың ықтимал таралуына байланысты жекелеген оқиғалар қарастырылып, олар қосымша техникалық және криминалистикалық сараптамадан өткен.
Министрлік өкілдерінің айтуынша, қазіргі уақытта мемлекеттік органдардың қызметтік хат-хабарлары мен ішкі құжаттарының ұлттық немесе қоғамдық қауіпсіздікке қауіп төндіретін көлемде жүйелі түрде таралғаны туралы расталған деректер жоқ.
Қауіпсіздік шаралары күшейтілді
Сондай-ақ тексеру барысында зиянкестер әртүрлі бағдарламалық құралдарды, соның ішінде зиянды бағдарламаларды қолданғаны анықталған. Осыған байланысты тиісті жауап шаралары қабылданып, ақпараттық жүйелердің қорғанысын күшейту бойынша қосымша ұсынымдар берілген.