В Атырау -10 
Алматы облысында шамамен жиырма бұрын жасалған кісі өлтіру ісі бойынша үкім шығарылды. Соттан жылдар бойы жасырынып келген қылмысқа қатысқан үшінші адам колонияға аттанады, деп хабарлайды өңірлік прокуратура.
Қанды оқиға 2006 жылдың қыркүйегінде болған. Үш ер адам такси жүргізушісі ретінде Қырғыз Республикасының азаматшасын автокөлікке отырғызған. Әйел адам буындырылып өлтірілген, оның жеке заттары ұрланған, ал сүйегін «Алматы – Қапшағай» жолына тастап кеткен.
Мұрағатта шаң басқан іс
2007 жылы екі сыбайлас сотталған, алайда үшінші тұлғаға қатысты іс жүргізу тоқтатылған. Қылмыстық іс мұрағатта болған және талаптарға қайшы түрде өткен жылдардағы ашылмаған кісі өлтірулер тізіміне енгізілмеген.
Бұл жасырын қылмысты анықтау Алматы облысы прокуратурасының қызметкерлері Аида Иманалиева мен Алия Сарсекеева жүргізген мұқият талдамалық жұмыстың нәтижесінде мүмкін болды.
Өткен жылдардағы істерге жүргізілген мониторинг барысында олар негізсіз тоқтатылған іс жүргізуді және қылмыскерді іздестіруге тиісті бақылаудың болмағанын анықтады.
"Прокуратура қызметкерлері деректер базаларына жан-жақты салыстыру жүргізіп, қосымша мәліметтер сұрату арқылы күдікті «К»-ның Қарасай ауданында нақты орналасқан жерін анықтады", - деп хабарлады ведомство.
19 жылдан кейін үкім шықты
Тергеу барысы ерекше бақылауға алынды. 2025 жылғы 9 шілдеде күдікті ұсталды. Дәлелдемелер жиналғаннан кейін іс сотқа жолданды.
2026 жылғы 24 ақпанда сот айыптау үкімін шығарып, кінәлі 16 жылға бас бостандығынан айырылды.
Үкім заңды күшіне енген жоқ.