Түркияда F-16 ұшағы апатқа ұшырап, ұшқыш қаза тапты

Балыкесир провинциясының губернаторы Исмаил Устаоглу елдің 9-шы негізгі авиабазасына тиесілі F-16 жойғыш ұшағының апатқа ұшырағанын және бір ұшқыштың қаза тапқанын хабарлады. Бұл туралы губернатор америкалық X әлеуметтік желісіндегі парақшасында жазды, деп хабарлайды АА.

Устаоглу ұшақтың қызметтік тапсырманы орындау кезінде апатқа ұшырағанын атап өтті.

Губернатор оқиға орнына — Измир–Стамбул автомагистралы бойындағы Наипли ауданына барып, жағдайды қарап шықты және жауапты тұлғалардан ақпарат алды.

Оның айтуынша, Балыкесирдегі 9-шы негізгі авиабазаға тиесілі F-16 ұшағы ұшып шыққаннан көп ұзамай апатқа ұшыраған.

«Қазір біз оқиға орнындамыз. Оқиға Измир–Стамбул автомагистралының Наипли ауданында болды. Біздің F-16 ұшағымыз ұшып шыққаннан кейін көп ұзамай құлады. Бір ұшқышымыз қаза тапты», — деді губернатор, марқұмға байланысты қайғыра көңіл айтып.

Сонымен қатар, F-16 апатқа ұшыраған Кареси ауданының Наипли бөлігіндегі автомагистраль қозғалысы жабылды.

Бұған дейін ұшақ шамамен сағат 00:50-де қызметтік ұшу кезінде апатқа ұшырағаны хабарланған болатын.