В Атырау -10 
Израильде 1200 адам, олардың ішінде Нобель сыйлығының лауреаттары, Жоғарғы соттың бұрынғы судьялары және қауіпсіздік құрылымдарының экс-басшылары бар, палестиналық тұтқындарға өлім жазасын енгізуді көздейтін заң жобасына қарсы шықты. Бұл туралы АА хабарлады.
Walla! порталының дерегінше, қол қоюшылар қатарында Нобель сыйлығының иегерлері Ада Йонат, Аарон Цехановер, Аврам Хершко және Дан Шехтман, сондай-ақ Жоғарғы соттың бұрынғы судьялары Мени Мазуз, Йорам Данцигер, Анат Барон және Джордж Кара бар.
Ортақ мәлімдемеде өлім жазасын қайта енгізу Израиль үшін моральдық дақ болып, еврей мемлекетінің болмысына қайшы келетіні айтылған. Бұған қоса, көптеген академиктер, университет ректорлары, прокурорлар мен әскери ардагерлер де бастамаға қарсы пікір білдірді.
2025 жылғы қарашада Кнессет заң жобасын алғашқы оқылымда мақұлдаған болатын. Құжат палестиналықтарға, әсіресе 7 қазан оқиғаларына қатысы бар деп айыпталғандарға өлім жазасын қарастырады және әскери соттарға стандартты процедуралардан ауытқуға мүмкіндік береді.
Бұл бастама аймақтық және халықаралық деңгейде сынға ұшырап, заңгерлер оны халықаралық құқық нормаларын ашық бұзу деп бағалауда. Қазіргі уақытта Израиль түрмелерінде 9 мыңнан астам палестиналық тұтқын бар.