В Атырау -10 
Рудный қалалық көпбейінді ауруханасында жоспардан тыс тексеру жүргізілуде, деп хабарлайды Azattyq Rýhy.
Денсаулық сақтау министрлігіне қарасты Медициналық және фармацевтикалық бақылау комитетінің мәліметінше, тексеруге блогер Татьяна Турлайдың әлеуметтік желідегі жазбасы негіз болған. Ол аурухананың терапиялық бөлімінде дәрілік заттар мен медициналық бұйымдардың жетіспейтіні туралы айтып, мекеменің материалдық қамтамасыз етілуін тексеруді сұраған.
Блогердің сөзінше, оның анасы аталған бөлімде үш аптадан бері ем қабылдап жатыр. Осы уақыт ішінде бөлімшеде физикалық ерітінді, бинт, тамшылатқыш жүйелер және бірқатар дәрі-дәрмек тапшылығы байқалған. Кей жағдайларда медбикелер қажетті құралдарды өздері әкелуге мәжбүр болған, ал пациенттер кейбір дәрілерді жеке қаражатына сатып алған.
«Кейбір медбикелер құралдарды үйден әкеледі, ал науқастар қажетті дәрілерді өздері сатып алуға мәжбүр. Мұндай жағдай базалық стационарлық көмек көрсететін бөлімде орын алуы алаңдатады. Рудный қалалық ауруханасының қамтамасыз етілуін тексеріп, науқастарға тиісті деңгейде медициналық көмек көрсетілуі үшін шара қабылдауды сұраймын», — деп жазды ол.
Комитеттің хабарлауынша, жоспардан тыс аудит барысында медициналық ұйымның қызметі және дәрілік препараттар мен медициналық бұйымдармен үздіксіз қамтамасыз ету мәселесі жан-жақты тексеріледі.
«Аталған жағдай ведомство басшылығының жеке бақылауында. Қостанай облысы денсаулық сақтау басқармасының мәліметінше, қазіргі уақытта аурухана бөлімшелері медициналық көмек көрсетуге қажетті дәрілік заттармен және медициналық бұйымдармен жеткілікті деңгейде қамтамасыз етілген», — делінген ресми ақпаратта.
Тексеру нәтижесі бойынша халыққа сапалы әрі уақтылы медициналық көмек көрсетуді қамтамасыз етуге бағытталған тиісті шаралар қабылданады.