В Атырау -10 
Мемлекет басшысы Қасым-Жомарт Тоқаев «ҚазМұнайГаз» ұлттық компаниясының басқарма төрағасы Асхат Хасеновпен кездесті. Кездесуде компанияның өткен жылғы қызметі мен алдағы жоспарлары талқыланды.
Асхат Хасенов былтыр Қытайдың CNOOC және Sinopec компанияларымен Атырау мен Батыс Қазақстандағы жобалар бойынша келісімшарттар жасалғанын айтты. Сондай-ақ BP, Turkish Petroleum Corporation және Хорват көмірсутегі агенттігі Қазақстандағы перспективті учаскелерді зерттеп жатқанын жеткізді.
Компания геологиялық барлау жұмыстарына ерекше көңіл бөліп отыр. 2025 жылы 8 іздеу ұңғымасы бұрғыланды, ал 2029 жылға дейін тағы 24 ұңғыма жоспарланған. Бұл бағыттағы инвестиция көлемі 900 млн доллардан асады.
Өндірістік көрсеткіштер де өскен. Мұнай мен конденсат өндіру көлемі 26,2 млн тоннаға жетіп, 2024 жылмен салыстырғанда 10 пайызға артқан. Газ өндіруді жылына қосымша 2,3 млрд текше метрге ұлғайту үшін бірнеше кен орындарында жұмыс жүргізілуде.
Үш мұнай өңдеу зауытында 17,5 млн тонна шикізат өңделіп, жеңіл мұнай өнімдері 13,6 млн тоннаға жетті. Сонымен қатар мұнай-газ химиясы мен газ өңдеу саласында жалпы құны 15 млрд доллардан асатын ірі жобалар іске асырылып жатыр.
Маңғыстау облысында тәулігіне 50 мың текше метр теңіз суын тұщытатын «Кендірлі» зауыты пайдалануға берілді.
Президент Қасым-Жомарт Тоқаев геологиялық барлау жұмыстарын жандандыруды және ірі инвестициялық жобаларды уақтылы іске асыруды тапсырды.
ҚазМұнайГаздың өндірістік көрсеткіштері өсіп, жаңа жобаларға халықаралық серіктестер тартылуда. Президент компанияға стратегиялық бағыттарды нақтылап берді.