В Атырау -10 
Атыраулық кәсіпкерлердің жер телімдерін алып қою туралы шешімдерге қатысты шағымдары Астанада қаралды. Нәтижесінде «Атамекен» ҰКП жанындағы кеңес рәсімдердің заңдылығын тексеруді және материалдарды Бас прокуратураға жолдауды ұсынды.
Жиын 5 ақпанда өтті. Өз құқықтарын қорғау үшін Кәсіпкерлер палатасына жеке кәсіпкерлер Константин Щербаков пен Иван Фролов жүгінді.
Олардың жер телімдері мына мекенжайларда орналасқан:
– Атырау қаласы, Азаттық даңғылы, 10-А (ЖК Щербаков В.К.);
– Атырау қаласы, Әбілқайыр хан даңғылы, 8-1 (ЖК Фролов И.А.).
Кәсіпкерлердің айтуынша, бұрын олардың жер телімдерін жеке компаниялар сатып алмақ болған, бірақ мәміле жүзеге аспаған. Осыдан кейін әкімдік жерді мемлекеттік қажеттілікке алу туралы шешім қабылдады.
Кеңес отырысында рәсімдер толық құжатсыз басталғаны айтылды. Яғни, жерді мемлекеттік жобаларға пайдалану қажеттігін дәлелдейтін жоспарлау материалдары, құрылыс жобалары және басқа да қала құрылысы құжаттары болмаған.
Кездесуге қатысушылар мұндай жағдайлар бизнестің қосымша тәуекелдерін туғызатынын және кәсіпкерлердің қабылданған шешімдерге деген сенімін төмендетуі мүмкін екенін атап өтті.
Талқылау қорытындысында Кеңес Атырау қаласы әкімдігінің шешімдерінің заңдылығын тексеруді, сыбайлас жемқорлыққа қарсы мониторинг жүргізуді және материалдарды Бас прокуратураға жіберуді ұсынды.
Бұған дейін "АЖ" „Ақ Жайық“ ескі қонақүйінің орнына жаңа қонақүй-іскерлік кешен салу жоспары туралы жазған еді. Бұл қонақүй сегіз жыл бұрын өртеніп кеткен. Жобаның иесі — TEXOL компаниялар тобының басшысы Шота Абхаза. Жобаның құны 250 миллион АҚШ долларына бағаланған.
Кәсіпкер Щербаковтың жер телімі жоспарланған құрылыс аумағына жақын орналасқан. Ол жерін сатудан бас тартқаннан кейін, меншік иесіне мемлекеттік қажеттілік үшін жерді алып қою туралы хабарлама келген.
Кәсіпкер И.Фролов та осындай хабарлама алды. Оның жер телімі Хиуаз Доспанова атындағы халықаралық әуежайдың жаңа терминалы салынатын аумаққа кіріп тұр. Жаңа терминал жобасын билік өңірдің басым инфрақұрылымдық нысандарының бірі деп атаған болатын. Бұған дейін қала әкімдігі әуежай маңындағы жер телімдерін алу мәселесі шешілгенін мәлімдеген. Алайда кәсіпкерлердің „Атамекен“ палатасына жасаған шағымынан көрініп тұрғандай, дау әлі де жалғасуда.
Айнұр САПАРОВА