Президент: жаңа Парламент депутаттары бес жылға сайланады

Қазақстан президенті Қасым-Жомарт Тоқаев Ұлттық құрылтайдың V отырысында жаңа Парламенттің жұмыс тәртібі мен рәсімдеріне қатысты ұсыныстарын жариялады.

Мемлекет басшысы заң қабылдау процесі үш кезеңнен тұратынын атап өтті:

1. Депутаттар заң жобасын жалпы мақұлдайды;
2. Өзгерістерді бекітеді;
3. Соңғы шешім ретінде заңды қабылдайды.

«Осылайша біз Парламент қызметін түбегейлі қайта құру арқылы саяси реформаларды жалғастырамыз. Мемлекеттің институционалдық тұғырын нығайтып, Күшті Президент – ықпалды Парламент – есеп беретін Үкімет қағидатына сәйкес орнықты саяси жүйе қалыптастырамыз», — деді Тоқаев.

Президенттің айтуынша, жаңа құрылым әділетті қоғам құрудың берік негізіне айналады. «Парламенттік реформа еліміздің әлеуетін арттырып, әлеуметтік-экономикалық өзгерістердің қарқынын күшейтеді. Мен бұған кәміл сенемін», — деп толықтырды ол.

Жаңа Парламентте депутаттарды бес жылдық мерзімге сайлау көзделіп отыр.