В Атырау +4 
Қазақстан Ұлттық Банкі қараша айының қорытындысы бойынша теңге бағамының АҚШ долларына қатысты 3,3%-ға нығайғанын хабарлады. Сауда-саттық көлемі 5,6 млрд долларға жетті. Ұлттық қордан 600 млн доллар сатылып, желтоқсанда тағы 400–500 млн доллар көлемінде валюта сатылуы жоспарлануда.
Қараша айының қорытындысы бойынша теңге бағамы АҚШ долларына қатысты 3,3%-ға нығайып, бір доллар үшін 512,57 теңге деңгейінде қалыптасты.
Қазақстан қор биржасындағы сауда-саттықтың орташа күндік көлемі бір ай ішінде 271 млн доллардан 280 млн долларға дейін өсті. Жалпы көлем 5,6 млрд долларды құрады.
Ұлттық қор қарашада республикалық бюджетке трансферттер бөлу үшін 600 млн доллар сатты. Бұл жалпы сауда көлемінің 10,7%-ын немесе күніне шамамен 30 млн долларды құрады. Желтоқсанда Ұлттық Банк алдын ала болжам бойынша 400–500 млн доллар сатуды жоспарлап отыр.
Айналым операциялары аясында қарашада 475 млрд теңге алынды, желтоқсанда да осындай көлемде валюта сату көзделген.
Ұлттық Банк қарашада валюталық интервенциялар жүргізген жоқ. Квазимемлекеттік сектор субъектілерінің міндетті валюталық түсімін сату көлемі шамамен 390 млн долларды құрады.
БЖЗҚ активтерінің валюталық үлесі 40%-дан асқандықтан, қарашада да, желтоқсанда да зейнетақы активтеріне доллар сатып алу жоспарланбады.
Ұлттық Банк транспаренттілік қағидатын сақтай отырып, валюта нарығындағы операциялар туралы толық ақпаратты жариялауды жалғастырады. Қысқа мерзімде теңге бағамының динамикасы нарық қатысушыларының күтулеріне, салық төлемдеріне, әлемдік нарықтағы жағдайға және геосаяси өзгерістерге байланысты болады.