Құлсарыдағы бекет жарылысынан соң:​ отбасы мен компания арасындағы дау сотта шешілмек​

22 жастағы Мирас Оқапов ата-анасының қазасынан кейін «Ниет» автогаз құю бекетінен 300 миллион теңгеден астам өтемақы талап етуде. Ал компания бұған дейін отбасыға көмек көрсетілгенін мәлімдеп отыр.

Отбасы туралы материал жарияланғаннан кейін редакцияға «Ниет» автогаз құю бекетінің өкілі, «Олжа» АҚ-ның Теңіз бөлімшесі басшысының орынбасары Қуанғали Сарбасов хабарласты. Оның айтуынша, бекет басшылығы алғашқы күндерден бастап қолдау көрсетуге атсалысқан. Туыстарына 3 миллион теңге берілген – Сарбасовтың сөзіне қарағанда, бұл қаражатты бекет қызметкерлері өз бастамасымен жинаған. Сондай-ақ үй құрылысын аяқтау, тұрғын үйді жөндеу, қарыздарды өтеу және ескерткіштер орнату мәселелері бойынша келіссөздер жүргізілген. Бұл әңгімелер марқұмның әкесінің ағасымен және басқа туыстарымен талқыланған.

Бұдан бөлек, отбасыға 860 мың теңге төленген — сұхбаттасушының айтуынша, бұл марқұмдардың жалақысы болған. Сондай-ақ ол бекет тарапынан мәйіттерді тасымалдауға көмек ұсынылғанын, алайда бұл іспен кейін әкімдік қызметкерлері айналысқанын жеткізді. Зират басында да қолдау көрсетілгенін айтты.

Алайда 307 миллион теңге көлемінде талап қойылғаннан кейін, Сарбасовтың сөзінше, отбасы байланысқа шықпай қойған. Осыдан кейін бекет мәселені сот арқылы шешуді ұсынған.

Ал марқұмдардың отбасы өз кезегінде бекет тарапынан ешқандай ресми көмек көрсетілмегенін айтады. Мирас Оқаповтың сөзінше, станция өкілдері олармен мүлде байланыспаған, ал мәйітханадан бастап жерлеуге дейінгі барлық ұйымдастырушылық және қаржылық мәселелер туыстарының мойнына түскен. Ол үш миллион теңгенің берілгенін растады, бірақ бұл — компания тарапынан емес, қызметкерлердің жеке бастамасы болғанын атап өтті.

Отбасы не талап етеді

Редакцияда қаза тапқандардың ұлы Мирас Оқаповтың атынан «Олжа» АҚ-ға жолданған сотқа дейінгі талап хатының көшірмесі бар. Бұл құжатты редакцияға компанияның өзі ұсынды.

Талап хатына сәйкес, отбасы ата-анасының — жарылыс болған сәтте «Ниет» автогаз құю бекетінде ресми жұмыс істеген кассир М. Сарбасова мен жүргізуші Б. Ибетовтің қаза болуына байланысты 307 миллион 200 мың теңге өтемақы талап етеді.

Есептеу мынадан тұрады:

• 92 миллион 160 мың теңге — ананың зейнет жасына дейінгі болжамды жоғалтқан табысы;

• 215 миллион 040 мың теңге — әкенің осыған ұқсас болжамды жоғалтқан табысы.

Бұл сомаға еңбек демалысы, сыйақылар және инфляция кірмеген.

Мирас Оқапов бұрын берілген 3 миллион теңгенің қызметкерлердің жеке бастамасы екенін, ресми өтемақы емес екенін атап өтті. Ол талап хатта мәселені ерікті түрде шешуді ұсынады. Егер компания келісімге келмесе, сотқа, полицияға жүгініп, моральдық зиян мен құқықтық шығындар үшін қосымша 1 миллион теңге өндіріп алуға ниетті екенін білдірген.

Қайғылы оқиға болған кезде төрт баланың бәрі кәмелет жасында болған, ең кішісі 22 жаста. Дегенмен Мирас бұл олардың әке-шешесі екенін және ешқандай ақша қазаның орнын толтыра алмайтынын айтты.

«АЖ» анықтамасы:

Жарылыс болған бекет — 1997 жылы Алматыда тіркелген «Ниет ЛТД» ЖШС-не тиесілі. Компания «Олжа» АҚ тобына кіреді, ол Қазақстандағы ең ірі жеке теміржол көлігі операторларының бірі. Топтың негізгі қызметі — мұнай өнімдері мен сұйытылған газды тасымалдау, сақтау және сату, сондай-ақ вагондарды лизингке беру және жылжымалы құрамға техникалық қызмет көрсету. Компания мәліметінше, оның операциялық басқаруында 2000-нан астам теміржол техникасы бар.

«Ниет ЛТД» ЖШС жеңіл мұнай өнімдерін сақтаумен және оларды өз желісіндегі автогаз құю бекеттерінде көтерме-бөлшек сауда арқылы сатумен айналысады, оның ішінде қайғылы оқиға орын алған бекет те бар.

Анастасия ШЕРСТЯНКИНА