В Атырау +1 
«БатысАльянсСтрой» ЖШС Сыбайлыс жемқорлыққа қарсы күрес қызметінің назарына ілікті, деп хабарлайды Zakon.kz.
Антикордың ресми өкілі Данияр Бегайдаровтың 2025 жылғы 30 маусымдағы мәліметінше, бұл мердігер компанияның Мәжіліс депутаты Әділ Жұбанов пен Атырау облысы әкімінің орынбасары арасындағы ықтимал байланысы тексеріліп жатыр.
Антикордың түсіндіруінше, әлеуметтік желілердегі мониторинг пен түскен хабарламаларды сараптау барысында мемлекеттік сатып алуларға, бюджет қаражатын төлеуге және өңірдегі мемлекеттік органдармен жасалған келісімшарттардың орындалуына қатысты ықтимал бұзушылықтар анықталған.
— Әлеуметтік желілерде конкурстарды өткізу және жұмыстарды төлеу кезінде мүмкін бұзушылықтарға қатысты деректер жарияланды. Бұл Ақпаратты есепке алу кітабына тіркеліп, Атырау облысының ішкі мемлекеттік аудит департаментіне жолданды, — деді Бегайдаров.
Сонымен қатар, Мәжілісте қазір мүдделер қақтығысын реттейтін заң жобасы қаралып жатыр. Заң қабылданса, мұндай жағдайлардың алдын алу заң деңгейінде қамтамасыз етіледі.
Бұған дейін Әділ Жұбанов таралған ақпаратты манипулятивті әрі шындыққа жанаспайды деп атап, бұл ақпараттық шабуыл оның бірқатар заңнамалық бастамалар мен кейбір мемлекеттік құрылымдарға сын айтуымен байланысты болуы мүмкін деп болжаған еді.
Ал облыс әкімі Серік Шәпкенов өзінің орынбасары Қайрат Нұртаев пен Мәжіліс депутаты Әділ Жұбановқа қатысты компанияға бағытталған айыптауларға пікір білдірген болатын.