Қытайда Бо Силайдың соты басталды

Бо Силай, Қытай коммунистік партиясы аймақтық басшыларының бірі. Қытайда бүгін Чунцин қаласының бұрынғы басшысы, Қытай коммунистік партиясының аймақтық ірі басшыларының бірі болған Бо Силайдың үстінен сот басталды. Оған пара алды, сыбайлас жемқорлыққа барды және билікті теріс мақсатта пайдаланды деген айыптар тағылып отыр. 

Қытай коммунистік партиясының аймақтық ірі басшыларының бірі болған Бо Силай осыдан бір жылдан астам уақыт бұрын дауға іліккен еді. Ресми хабарда оның «көмекшісінің АҚШ-қа қашпақ болғаны үшін» отставкаға кеткені айтылды. Оның көмекшісі әрі полиция басшысы Ван Лицзюнь 2012 жылы ақпанда АҚШ консулдығына барып саяси баспана сұраған.

Көп ұзамай Бо Силайға «отбасы мүшелерімен бірге жемқорлыққа араласты және әйелінің кісі өліміне қатысты қылмысын жасыруға тырысты» деген айып тағылғаны туралы хабар тарады.

Чунцин қаласындағы жұмысында коррупцияға қарсы қызметімен жақсы танымал болған Бо Силай қытай компартиясының тұрақты саяси кеңесіне мүшелікке басты үміткер болатын.

Бо Силайдың айыпталуы Қытайда соңғы бірнеше жылдағы ең үлкен саяси жанжал болды. Сол даудан соң Қытайда саяси бюроның бірталай басшысы қызметінен кеткен.

Сот Бо Силайды тағылған айыптар бойынша кінәлі деп тапса, ол өлім жазасына кесілуі не ұзақ мерзімге сотталуы мүмкін.

Дереккөз: azattyq.org