ХҚКО-ның «Жеке менеджер» және «Үйге барып қызмет көрсету» қызметін 500-ден аса атыраулық пайдаланған

Халыққа қызмет көрсетуді ыңғайландыру мақсатында «Азаматтарға арналған үкімет» МК халыққа қызмет көрсету орталықтарында «Жеке менеджер» және «Үйге барып қызмет көрсету» қызметтерін белсенді түрде жүзеге асыруда. Бұл қызметтерді 2024 жылдан бері 500-ден астам азамат пайдаланған. Ол туралы «Азаматтарға арналған үкімет» мемлекеттік корпорациясы КЕ АҚ Атырау облысы бойынша филиалының PR менеджері Әділет Сәбитов мәлім етті,-деп хабарлайды Өңірлік коммуникациялар қызметі.⠀

«Жеке менеджер» қызметі аясында жеке менеджер өтініш берушіге басым кезек бойынша қызмет көрсетіп, барлық қажетті құжатты рәсімдеуге көмектеседі. Оның ХҚКО бөліміндегі құны 5500 теңге, ал мамандандырылған ХҚКО-да 6088 теңге. Десе де бұл қызмет төлқұжат пен жеке куәлікті рәсімдеуге арналмаған.

Мамандардың сөзінше, ХҚКО-ға келе алмайтын азаматтар үшін енді жеке менеджердің үйге барып қызмет көрсете алатынын көбі біле бермейді. Бұл, әсіресе, бала күтіміндегі аналарға, денсаулығына байланысты жүріп-тұра алмайтын азаматтарға ыңғайлы.

- Кейбір азаматтар денсаулық жағдайына байланысты немесе басқа да себептермен ХҚКО-ға келе алмайды. Мұндай жағдайда біз олар үшін үйге барып қызмет көрсетуді ұсынамыз. Ол үшін 1414 байланыс орталығына қоңырау шалып, өтініш қалдыру жеткілікті. Жауапты маман үйге барып, қажетті құжаттарды рәсімдеуге көмектеседі. Бұл қызметтің құны 7190 теңге. Алайда мүмкіндігі шектеулі азаматтар үшін қызмет тегін көрсетіледі, – деді Ә. Сәбитов.
⠀
Айта кетейік, бұл қызмет түрлері тек Атырау қаласында ғана көрсетіледі.