Сәтпаев даңғылында ағаштар кесілуде

Атырауда Сәтпаев даңғылында ағаштарды кесу жұмыстары жүріп жатыр. Алайда, тұрғындар мен әлеуметтік желі белсенділері тек сынған бұтақтар емес, ағаштардың ортасынан кесіліп жатқанын айтып, алаңдаушылық білдіруде. Сондай-ақ, олар: "Құстар мен олардың ұяларына не болады? Ұяларды жай ғана жерге тастай ма, жойып жібере ме? Әлде құстар салық төлемегені үшін қуылып жатыр ма?" деп наразылық білдіріп жатыр.

Қалалық әкімдіктің мәліметінше, бұл – санитарлық және жасартушы кесу жұмыстары, олар өсімдіктердің вегетациялық кезеңі басталғанға дейін, яғни наурыздың соңына дейін жүргізіледі. Бұл шара ағаштарға түсетін стрессті азайтып, олардың тез қалпына келуіне мүмкіндік береді; аурулар мен зиянкестердің таралуын болдырмайды; құрғақ және қауіпті бұтақтарды жою арқылы жаяу жүргіншілер мен көлік қозғалысының қауіпсіздігін қамтамасыз етеді; қаланың эстетикалық келбетін жақсартуға көмектеседі.

Әкімдік ағаштардағы қарғалардың ұялары табиғи ортаға зиян келтіреді деп отыр. Олардың айтуынша, қазір бұл ұяларда балапандар жоқ, сондықтан құстарға зиян келтірмей жұмыстар жүргізіліп жатыр. Тал кесу жұмыстары «Жасыл желектерді күтіп ұстау» мемлекеттік-жекеменшік әріптестік жобасы аясында іске асырылып, алдын ала мақұлданған. 

Нұрбейбіт НҰҒЫМАНОВ