Мақат ауданының әкімдігі 27 баланың арман-тілегін орындамақ

Мақат ауданында “Армандар орындау шыршасы” өтті. Мұндай форматтағы іс-шара өңірде алғаш рет ұйымдастырылып отыр, - деп хабарлайды Өңірлік коммуникациялар қызметі.

Аудандағы ата-ана қамқорлығынсыз қалған балалар жаңа жылдық тілектерін қағаз бетіне түсірді. Кейін аудан әкімі Азамат Мәмбетов, аудандық мәслихат төрағасы, аудан прокуроры, аудандық ішкі істер бөлімі, аудан әкімінің орынбасарлары, кент әкімдері мен аудандағы өндірістік мекемелердің басшылары кішкентайлардың хаттарын оқып, оны орындауға кірісіп кетті. Бір топ бала өздеріне қажетті түрлі затты сұраса, екіншілері армандап жүрген мамандықтары бойынша бір күндік өмірмен танысқылары келетіні туралы жазған.

Аудан әкімдігі бүлдіршіндердің жазған арман-тілектерін 2025 жылы толық орындауға уәде берді.