Қазақстандық ғалымдар батыс өңіріндегі жолдарды қалай төзімді етуді ойлап тапты

«ҚазжолҒЗИ»-де Қазақстанның батыс облыстарының жағдайына бейімделген құмды топырақтарды нығайтатын бірегей катализатор әзірленді.

«ҚазжолҒЗИ» екі жыл бойы цемент-бетонды жолдардың өзгерісін тіркеп, проблемалы учаскелердегі ақаулардың егжей-тегжейлі картасын жасап келеді. Ғалымдар химиялық және температуралық талдаулар, рентгендік зерттеулер жүргізіп, бұзылған жіктерге бақылау жасады. Бұл зақымдану сипатын толығырақ зерттеуге мүмкіндік берді.

Ғылыми зерттеулер нәтижесінде институт Қазақстанның батыс аймақтарының жағдайына бейімделген құмды топырақтарды нығайтуға арналған бірегей катализатор жасап шығарды», - деп хабарлады ҒЗИ. 

«Жаңа қоспа иондық өзара әрекеттесуді белсендіреді, құмның шаң бөлшектерін байланыстырып, оларды шөгінді жынысқа айналдырады, бұл жол негіздерін берік әрі мығым етеді. Бұл жоба цемент-бетонды жолдардың қызмет ету мерзімін ұзартуға және оларды күтіп ұстауға кететін шығынды азайтуға мүмкіндік береді», - деп атап өтті ғалымдар.